أحب البيـك كله وأكـــره المو بيك
لذالك كمت احبك عامي شامي

ومو بس برضاك اتولعت بيك
بخصامك حيل متولع خصامي

يشابع نوم ما كالولك اشصار
بغيابك ايدي ما رحمت بكصتي

يشابع نوم انا شابع بجي اعليك
وما همني البجي ودمعي وعبرتي

ومن يا ناحيه تريد اني انساك
اموت اعليك من كل النواحي

تتوسل جراحي بلجمه منك
ومن غيرك دوه وترفض جراحي

يشابع نوم ما جيتك بالاحلام
انه ما انام واحلم بيك صاحي

يشابع نوم ما فزيت عالصوت
كبور البالنجف سمعت صياحي

بصفاحي بقه بس اثر سهمك
ولان سهمك طلع اصفك براحي

واثر سهمك لان بس بالصفحتين
السلم من جسمي ضل يحسد اصفاحي

عليك اطوطحت صاحي مو سكران
وانه اول محب سكران صاحي

دوام اهل المدارس وكت واحد
ودوامك بالكلب عصري وصباحي